ई अंबर चाही

बाल कविता-245
ई अंबर चाही

नै पिज्जा नै बर्गर चाही
नै कुरकुरे कड़गर चाही
हम माँगै छी एतबे बौआ
उड़ै लेल ई अंबर चाही

नै सोनाक पिंजरा चाही
नै टिकड़ी नै टिकड़ा चाही
अपने हाथक तोड़ल बौआ
नीमक फर तीतगर चाही

नै मिर्ची नै अमरूद चाही
नै सिनेह ई अदभुद् चाही
सुस्ताइ लेल हमरा बौआ
गाछक ठाँढ़ि सुन्दर चाही

नै मैदा नै चिन्नी चाही
नाम हमर नै गिन्नी चाही
रही भुखलो तैयो बौआ
हमरा धरती नम्हर चाही

उड़ा दिअ पिंजरासँ हमरा
रहब संगे ओगड़ब दुअरा
नै भागब हम कतौ बौआ
एगो मीत पियरगर चाही

अमित मिश्र