♡♡♡53♡♡♡
आनक खुशीमे कानै छी हम
हमर खुशीमे कानय आन
विपरीत रीत सदा चलि एलै
मनुक्खक इएह थिक पहिचान
♡♡♡54♡♡♡
लोभ-मोहक व्यूहमे फँसि कऽ
लोक करैये खूबे पाप
स्वार्थ एतऽ बलशाली बनलै
लोके लोकक लेल अभिशाप
♡♡♡55♡♡♡
भेड़िया साधु बनि सकै छै
मनुख बानि नै छोड़ि सकत
नरकक डर रहै छै मनमे
पापसँ मुँह नै मोड़ि सकत
♡♡♡56♡♡♡
निसबद राति डेराउन लगैए
काँपय सगरो तन मन
मुदा चानक दरस पाबै लेल
तोड़ऽ पड़त सब बन्हन
♡♡♡♡57♡♡♡♡
हारि हारि कऽ जीतब मीता
नीक लगैत अछि खूब
संघर्षक सुआद भेटय तखने
जखन पानि रहय उबडूब
♡♡♡58♡♡♡
पाथर एतऽ पूजल जाइत अछि
पाथरेक होइ छै जयकार
पाथर तरासि जे मूर्ती बनबय
तकरे भेटै छै फटकार
♡♡♡59♡♡♡
चौबिस घंटा देह गलबय जे
तकरो दुर्लभ तीमन दर्शन
मजदूरक जीवन एहने सन छै
जेना हो टूटल दर्पण
♡♡♡60♡♡♡
गारि-मारिक बोइन भेटै छै
अपमानक पनिपियाइ
तैयो मजदूर पेटक खातिर
नगर नगर बौआइ
♡♡♡61♡♡♡
पूनम चान मलिछाह लगैए
मन हो जेना उदास
कोनो राहु फेर घोंटलकै
प्रेमक अनूप प्रकाश
♡♡♡62♡♡♡
ओहि मनुखक भविष्य की हेतै
की हेतै ओकर अतीत
जकरा लग कहियो नै पहुँचल
साहित्य आ संगीत
♡♡♡63♡♡♡
दू परिवारक बीच सम्बन्धक
पूल बनाबय बेटी
धरती सन सहनशील बनि
सब बोझ उठाबय बेटी
♡♡♡64♡♡♡
कने उधारी सिनेह माँगै छी
चाहै छी बतियाइ
कारी नैनक झीलमे धसि
सेनूर लगा नहाइ
♡♡♡65♡♡♡
इच्छा कखनो अंत करय नै
इच्छा अगम अथाह
इच्छे कारण जीवन जगमग
नै तँ राति सियाह
♡♡♡66♡♡♡
मनुखक इच्छा मरि सकत नै
बरू मनुख मरि जाएत
मृगमारिचिका सन ई इच्छा
प्रतिपल मनमे आएत
♡♡♡67♡♡♡
खन पिघलै छी प्रेम अगिनमे
खन जुआरि होइ मंद
खन हर्षित खन पीड़ित बनै छी
खूब उठैए द्वन्द
♡♡♡68♡♡♡
अतीतक फन्ना उनटायब तँ
मनमे उठत हिलोर
मुस्क, सिसकी संगे निकलत
होयब भाव विभोर
♡♡♡69♡♡♡
कठोर देह आ कोमल हिया
राखू अहाँ मीत
कर्म अपन सुन्नर रहत तँ
होयत सगरो जीत
कोई टिप्पणी नहीं:
एक टिप्पणी भेजें