चरिपतिया इच्छा

#चरिपतिया इच्छा
♡♡♡♡♡♡
इच्छा कखनो अंत करय नै
इच्छा अगम अथाह
इच्छे कारण जीवन जगमग
नै तँ राति सियाह

∆∆∆∆∆∆∆∆
इच्छाकेँ सुड्डाह करी त'
चिन्तो हएत सुड्डाह
हँसी-खुशीमे जिनगी बितत
नै कोनो परवाह

∆∆∆∆∆∆∆∆∆
मोनक इच्छा मनहिं दाबि ली
नै बाजी यौ भाइ
सुनि क' लोक करय बड़ चर्चा
झुट्ठे सभ ठिठियाइ

∆∆∆∆∆∆∆∆∆∆

मगन चित्त आ खुशी अधरपर
जँ इच्छा पुरि जाइ
नै त' नोर बहय सरिता बनि
हँसी सेहो भसियाइ

∆∆∆∆∆∆∆∆∆∆∆
इच्छाकेँ दू पाँखि लगा क'
उड़ल करी अकास
जखन समय प्रवल भ' जेतै
पुरतै सभटा आस

∆∆∆∆∆∆∆∆∆
मानलौं होनी प्रबल होइ छै
तैयो चाही इच्छा
बिनु इच्छाकेँ काज सफल नै
लेलौं एतबी शिक्षा

∆∆∆∆∆∆∆∆∆∆∆∆
हमर इच्छा एतबी छल जे
करितौं अहाँ प्रेम
मुदा रहल सपने धरि सीमित
नैनक सभटा गेम

©अमित मिश्र