बिनु इच्छा नै काज चलय
जिनगी निरस लागय
पोसय इच्छा मनमे तऽ
खुशहाली गुनगुनाबय
मोनमे अछि भीड़ बड
बाहर अछि सुनसान
की होली की दिवाली
की मनायब रमजान
मेंहदी रचल हाथमे
अछि बड़का संताप
आगू जिनगी बोझ बनत
पड़त गृहस्थीक चाप
हँसि हँसा कऽ जीबू मीता
कानि कानि की जीयब
ढाकी भरि भरि भेटत खुशी
दोसरोक नोर जँ पीयब
झील सन दुहु नयन
कमल फूल सन गाल
माछ सन चंचल वदन
औ जी करय कमाल
कुसुम कली सन कामिनी
कनक रंग अछि अंग
मोनक घुँघरू बाजि उठय
जखन रहथि ओ संग
माटिक जनमल रंगसँ
राँगल अछि मधुमास
पीयर सरिसो प्रेम उझलि
भौंरा लेल भेल खास
तुलसीचौरा भेल निपत्ता
बनलै समतल फर्श
बेटी, बेटा बनि रहलय
देखू वर्षे वर्ष
पर्दा पाछू देख लिअ
उठल अजब तूफान
देखिते पिया, हियामे
मारय कोशी उफान
एहन आहट नीक नै
तनमन दै सिहराय
टुटतै तार सिनेहक
बूझि पड़ैए आय
प्रेमक परिभाषा बदलि गेल,
बदलि खेल ओ रीत
राधा आधा वसनमे बैसल,
कृष्ण किनै छथि प्रीत
राधा-कृष्णक रास बनल अछि
आइ-कल्हि बड खास
प्रेमक बीया बाउग नै होइये
होइये (देहक) चास
आइ हियामे जानि नै
, भेल केहन अनघोल
विहुँसैत ठोरक बीचसँ
, निकसल बसंती बोल
नव मशीनक युगमे बाजू,
निकलत कोना काग
डीजे छोड़य तान एते जे
बिसरि गेल सब राग
हिया बीचमे जहर भरल,
तेँ तऽ शब्द कटाह
ककरा संगे हाथ मिलत,
सब के सब मरखाह
स्वपीड़ाकेँ भोगि लिअ,
आनक सुखकेँ छोड़ि
नै तऽ धधरा उठत हिया,
मारत मूड़ी मचोड़ि
कोई टिप्पणी नहीं:
एक टिप्पणी भेजें