सुरभित मज्जर गाछकेँ अछि
सजा रहल नव रूप
विहुँसैत प्रकृति पातपर
लागय दृश्य अनूप
♡♡♡♡♡♡
झील सन दुहु नयन
कमल फूल सन गाल
माछ सन चंचल वदन
औ जी करय कमाल
♡♡♡♡♡♡
जीवनक बोझ तर दबल
बौआ रहल सगरो दुनियाँ
जीवन सुखमय बनैए तखने
जँ आँगन आबथि बुधिगर कनियाँ
♡♡♡♡♡♡♡
नैनक बाटे पैस कऽ
धड़कन धरि चलि एलौं
एहन रोग लगेलौं जे
सपनो धरि सन्हियेलौं
♡♡♡♡♡
एहि अन्हरमे फसि कऽ
लोक भेलै वेपर्द
अंग झाँपै लेल आबऽ दैवा
बनि कऽ मोसम सर्द
♡♡♡♡
नीम गुरीच बनल भरि दुनिया
मधु केर अभाव
टिभकि रहल अछि मोन बड
चैती केर प्रभाव
♡♡♡♡♡♡
हमर गीतक भासपर
नाचय तोहर मोन
प्रीतक बस एतबे परिभाषा
हम चानी तूँ सोन
♡♡♡♡♡♡
एहि जगतीमे सभक संगे
स्नेहक डोरी जुड़ल रहय
बस एतबे अभिलाषा हमर
किओ ने हमरा गलत कहय
♡♡♡♡♡
बड भारी अपराध तेँ
डोलि रहल अछि धरती
प्रकृतिकेँ दोहन केलासँ
जीबि सकत नहिं जगती
♡♡♡♡♡♡
बनलौं जहिया मनमीत हमर
ओहि दिनसँ होली भऽ रहलै
नेहक इंधन पीबि-पीबि
जिनगीक इंजन दौड़ऽ लगलै
♡♡♡♡♡
प्रेम भावना तप त्याग
सब लगैए व्यर्थ
डेग डेगपर माँगैए
बात बातपर अर्थ
♡♡♡♡♡♡
अनुशासनसँ बन्हा कऽ
माँगल जाइछ जे भिक्षा
लीबि कऽ रहब सिखबै
ओकरे कहै छी शिक्षा
कोई टिप्पणी नहीं:
एक टिप्पणी भेजें