जुनि चढ़ कदम्ब केर ठाढ़ि
बरसै नैना धड़कै छाती अगबे ममता ढारि
रे कान्हा, जुनि चढ़ कदम्ब केर ठाढ़ि
पातर ठाढ़ि बड लच-लच लचकै
घौनगर पातमे किछु नै झलकै
डाँरकडोरि फँसतौ कपड़ो फाटतौ
चर्र-चर्र कड़-कड़ सूनि मोन हहरौ
दहाड़ैत एलै पुरिबा पवनक बाढ़ि
रे कान्हा, जुनि चढ़ कदम्ब केर ठाढ़ि
जुनि छेड़ मधुर बँसुरिया केर धुन
गोपी-ग्वाल एतौ झुण्डक झुण्ड, सुन
सब लुधकत सबटा ठाढ़ि-पातपर
बढ़तै बड ओजन गाछक गातपर
टूटि खसतै लऽ तोरो सबटा ठाढ़ि
रे कान्हा, जुनि चढ़ कदम्ब केर ठाढ़ि
उतर, देबौ तौला माखन-मिश्री
उख्खरि नै बान्हबौ, नै कोनो फँसरी
नै उतरबें तँ सत्ते रूसबौ हमहूँ
बाबा, ताऊ, आ ने बतियेबौ हमहूँ
समेबौ यमुना केर छाती फारि
रे कान्हा, जुनि चढ़ कदम्ब केर ठाढ़ि
अमित मिश्र
कोई टिप्पणी नहीं:
एक टिप्पणी भेजें